Hikitia ana ngā pakihi o Taranaki e Te Matatini

Kua tū te haka a Tāne Rore me ngā mahi a Hine Rēhia!

Ka kaha hikitia ngā pakihi o roto o Taranaki i te taumāhekeheke kapa haka mutunga mai o te ao, te kī a te Minita Toi a Paul Goldsmith rāua ko te Minita Whanaketanga Māori a Tama Potaka. 

I tatu atu a Minita Potaka ki te pōhiri whakarewa i Te Matatini o Te Kāhui Maunga 2025 i tū ki Te Taiwhanga Hākinakina o Yarrow - ki Ngāmotu i te 24 Huitanguru. Mai i te Rātū 25 Huitanguru ki te Rāhoroi 1 Poutūterangi, e tū te 55 ngā rōpū ki te haka i te haka a Tānerore, me te mahi i te mahi a Hine Rehia ki te papa tūwaewae i te Oko o Brooklands ki Te Papatākaro o Pukekura ki mua i te aroaro tonu o te iwi nui i reira me tētahi 2.5 miriona kaimātakitaki anō ki runga i te pouaka whakaata, te ipurangi rānei.

“Kātahi te rerehua o te pōhiri hei tāwhiri mai i tēnei huihuinga whakahirahira ki roto i te rohe i raro i te mātaitanga o Te Kāhui Tipua - a Taranaki,” te kī a Minita Potaka.

“Ko te taumāhekeheke Orimipia tēnei o te ao kapa haka ka mātakitia ai e tātou. Ka tae mai ko te tini mano o te tāngata ki konei i tēnei wiki, oti rā, ka mauria mai anō hoki te tini miriona tāra ki te ōhanga ā-rohe. Ko te hua o tēnei ka hikitia ngā momo pakihi huri noa te rohe tae atu ki ngā whare noho, ngā kaiwhakarato me ngā wharekai.

“Kāore i tua atu, kāore i tua mai i te hiranga a te kapa haka ki Te Ao Māori nō te hāpaitanga ake o tēnei momo āhua o te waiata ā-ringa nā Tā Āpirana Ngata. He taonga nui te kapa haka e whakamarumaru ana, e whakarauora ana hoki i tō tātou reo rangatira. 

“I muri i te mahi nui o te takatū me te whakawai, kātahi te mahi nui ko te whakaritenga o te taiopenga pēnei te nui, me tini tonu ngā tāngata e whakapau kaha tahi ana mā te katoa ngā hua.”

Hikitia ana ngā pakihi o Taranaki e Te Matatini