Ka tuwhera te Tahua Whakanui i te Rā o Waitangi 2024 (te Tahua) atu i te Mane, 11 o Hepetema ki te Paraire, 13 o Ōketopa, ā, kei roto ngā paearu kua whakahoutia.

Ka tautoko te Tahua ā-tau nei i ngā hapori paetata ki te whakanui i te waitohutanga o Te Tiriti o Waitangi (Te Tiriti).

Ko Te Manatū Taonga te kaiwhakahaere o te Tahua, otirā he whakarite i ngā rōpū hapori, ngā kaunihera ā-rohe me ngā tāngata whenua ki te whakarite kaupapa e whakawhānui ana i tō tātou mārama ngātahi ki Te Tiriti.

"E hihiri ana mātou ki te whakaputa i te whakahoutanga o ngā paearu o te Tahua mō te rauna 2024, hei whakangāwari ake i te tukanga mā ngā kaitono" hei tā Leauanae Laulu Mac Leauanae, Te Tumu Whakarae o Te Manatū Taonga.

"Ko ētahi whakahoutanga ki ngā paearu ko te tono i ngā kaitono ki te whakaatu i te āhua o te hiki a tō rātou kaupapa i te aroā me te māramatanga o te Tiriti, te whakanui i ngā kōrero ā-rohe a te Māori, te whakaatu i te tautoko a ngā iwi, hapū paetata rānei, te akiaki i te hapori whānui kia whai wāhi ake, me te whakatutuki i ngā matea tomopai o tō rātou hapori.

"Tēnei rā taku mihi ki te hunga katoa i tuku kōrero mai mō ngā paearu hou hei āwhina ki te whakarite kia mārama tonu te Tahua, me te whakapiki i te kounga o te hunga tuku tono, " hei tā Laulu Mac

Ka noho ōrite tonu ētahi āhuatanga o te Tahua Whakanui i te Rā o Waitangi, hei tā Glenis Philip-Barbara (Ngāti Uepōhatu, Ngāti Porou), Te Pou Mataaho o Te Hua, ki Te Manatū Taonga.

 "Atu ki te $300,000 te nui o te pūtea tauwhaiwhai e wātea ana mō ngā kaupapa puta noa i te motu ka whakanui i te waitohutanga o Te Tiriti, me te whakakotahi i ngā hapori.

“He whānui ake te Rā o Waitangi i ngā whakanui ka tū ki Waitangi. I kawea hoki Te Tiriti ki ngā tōpito o te motu, ā, kei te hiahia mātou ki te āwhina i ngā hapori o Aotearoa ki te whakanui i te pānga o tēnei tiriti ki te whakatū i te whenua e noho nei tātou i tēnei rā.”

"Nā te rauna pūtea i tērā tau i āwhina ki te tautoko i ētahi momo kaupapa whānui, pēnei i te kapa haka, ngā whakaaturanga toi, tae noa ki ngā whetiwara ā-hapori nui. E rikarika ana mātou ki te kite he aha ngā kaupapa e whakaarotia ana e ngā hapori me te āwhina a te Tahua," hei tā Glenis.

E tuwhera ana te tahua otirā ka kati ā te 13 o Ōketopa 2023.

Mō ētahi atu mōhiohio mō ngā paearu hou me te tuku tono, tēnā haere ki te paetukutuku a Te Manatū Taonga.

KA MUTU

Mō ētahi atu mōhiohio mō te hītori o te Rā o Waitangi, haere ki: Waitangi Day (NZHistory)

Te rārangi o ngā paearu hou

• Ka aro te kaupapa me ngā mahi ki te whakanui i Te Tiriti o Waitangi me tana waitohutanga
• Ka hiki te kaupapa i te aroā me te mātauranga ki Te Tiriti o Waitangi
• Ka whakanui, ka whakaputa hoki i ngā kōrero a te Māori paetata, me te whakaatu i te whai wāhitanga me te tautoko whaitake i ngā iwi/hapū
• Ka whakatairanga, ka akiaki hoki te kaupapa i te whai wāhitanga o te hapori whānui, mā te akiaki i ētahi atu ahurea ki te whakaputa i ō rātou wheako, kōrero me ngā whakaaro
• Ka whakaatu ngā kaitono i te āhua o te whakatutuki o tā rātou kaupapa i ngā matea tomopai o tō rātou hapori, tae atu ki te hunga hauā
• Ka tū te kaupapa i te rā tonu, pātata rānei ki te Rā o Waitangi (6 o Pēpuere), hei ngā rā tāpua ki te waitohutanga o te Tiriti, ina koa rā ki tētahi hapori, rohe rānei.